समय र घोडादौड

---

कृष्ण कुसुम

                                 

वर्षौं देखि उसैगरि दौडिरहेछन्         

टुँडिखेलमा घोडाहरू !

घोडचढि सिपाहीहरू

हातमा लगाम लिएर

दौडाईरहेछन्  आ-आफ्नै घोडाहरू

विजयी हुने होडमा

 

पहिले पहिले

राजा महाराजाहरू सवार हुन्थे

र नजर गर्थे घोडेजात्रा

तर आजभोलि

भैंसी गोठालाहरू

साधारण किसानका छोराहरू

आउँछन् टुँडिखेल र

हौस्याउँछन् खेलाडीहरूलाई

        

समय र घोडचढि सिपाहीहरू

उस्तै उस्तै रहेछन् आखिर !

घोडचढिहरू आफ्नो लगामले दौडाउँछन् घोडाहरू

र समय आफ्नो लगामले दौडाउँछ समाजलाई

आफ्नो रफ्तारसँगै !

 

समय र घोडाको

यो दौड हेरेर पनि

म असमर्थ छु निर्क्यौल निकाल्न

समयको रफ्तारमा दौडिरहेछन् घोडा

वा घोडाको रफ्तारमा दौडिरहेछ समय ?

Author - कृष्ण कुसुम | Posted on Aug 7 2010 Saturday | Views : 5352
कुसुस्को राष्ट्रिय कविता प्रतियोगिता २०६६