\"नयाँ नेपालको परिवेश\"

---

कुशुम सेढाइ

 

नयाँ नेपाल एउटा आश्रम जस्तो

यो एउटा घना जङ्गल जस्तो

मानौ सबै राजधानी तान्ने चुम्बक जस्तो

काला बजारियाको तस्करी जस्तो

महङ्गी भिडभाड र अनीकालले भरिए जस्तो

त्यही त...पानी र विजुली अकाशीए जस्तो

खै कस्तो कस्तो ।।

 

न छ यहाँ बस्नलाई कोठा खाली

न छ यहाँ विकास नव राजनीतिमा सहभागी

न त सडकले पाउँछ सास फेर्न पाली

जताततै धुलामैलो प्रदुषण र अत्याचारी

 

सबै ठाँउ भरि सके घरै घर बस्तीको

धनीलाई चिन्ता छैन सुख सयलको

बाँच्नै गारो सुरक्षा बिना कोही नहुनेको

यहाँ काम पनि छैन घुस र आदेश बिनाको ।।

 

हो ...यसरी नयाँ नेपाल एउटा संकटको

वाण भएर प्रहार भएको छ ।

भोको शरिरले आज देशै निल्ने प्रयास गरेको छ ।

यता महङ्गीको भार खेप्न नसकी

जिन्दगी बन्दकीमा परेको छ

उता खडेरीले बाली नाली भुइमै पसारो पारेको छ ।

 

आज यहाँ गाँउ गाँउमा भुस्या कुकुरसरी

माग्नेको लाम देख्छ

दानव सरी मानवमा चोरी डकैती र

हत्याको भावना बढ्दो देख्दा

सुख सयल मोजमस्ती र फेशन

प्रतियोगिताले गगन चुमेको देख्दा

धुवाँ धुलो र रगतको खोला बगेको देख्दा

आफ्नै मातृभाषा अपहेलित भएको देख्दा

लाग्छ नयाँ नेपाल उखानै उखानले भरिएजस्तो

लाग्छ नयाँ नेपाल केवल पानाभर सिमित भए जस्तो

खै कस्तो कस्तो नयाँ नेपाल ।

खै कस्तो कस्तो......।

Author - कुशुम सेढाइ | Posted on Aug 6 2010 Friday | Views : 5428
कुसुस्को राष्ट्रिय कविता प्रतियोगिता २०६६